Kaup á notuðum bíl

Kaupandi verður að hafa það í huga við kaup á notuðum bíl að eðlilegt slit er sú áhætta sem kaupandinn ber sjálfur og hvetjum við viðskiptavini okkar til að uppfylla skoðunarskyldu kaupanda samkvæmt kaupalögunum!

Á heimasíðu Félags íslenskra bifreiðaeigenda, www.fib.is er að finna gátlista sem hægt er að styðjast við þegar bíll er skoðaður en einnig getur kaupandi fengið óháðan skoðunaraðila til að ástandsskoða bifreiðina.

Til athugunar vegna bílakaupa

  • Er lakk skemmt eða sést ryð?
  • Athugið með segli hvort gert hafi verið við með plastfylliefnum. Segullinn dregst aðeins að járni.
  • Bendir eitthvað til að bíllinn hafi skemmst í árekstri?
  • Bankið í bretti þar sem þeim er fest og í kringum luktir.
  • Athugið hugsanlega ryðmyndun og frágang ryðvarnar í hjólbogum.
  • Móða innan á bílrúðum í þurrviðri getur verið vísbending um ryð.
  • Athugið hvort yfirbygging hafi skekkst.
  • Falla hurðir vel að?
  • Er framrúða rispuð eða skemmd eftir steinkast?
  • Lyftið gólfmottum til að kanna hugsanlega ryðmyndun. Athugið einnig undir mottu í farangursgeymslu og undir varadekkið.
  • Þefið af teppum, myglulykt getur bent til leka.
  • Skrúfið rúðurnar upp og niður, athugið slit í lömum með því að lyfta undir hurðir.
  • Athugið kælivatn á vél - engin olía má vera í vatninu. Olía í kælivatni gæti bent til þess að "headpakkning" sé léleg eða að blokkin sé sprungin.
  • Eru óhreinindi eða olía utan á vélinni?
  • Athugið hvort dropar séu undir bifreiðinni. Kanna þarf hvort um sé að ræða vélarolíu, bensín, bremsuvökva, kælivatn eða annað. Sé leki getur viðgerð verið kostnaðarsöm.
  • Lítur bifeiðin almennt út fyrir að vera illa hirt?
  • Athugið rafgeymi, er útfelling við pólana?
  • Mælið olíu á vélinni. Lítil eða óeðlilega þykk olía bendir til að vélin sé mjög slitin.
  • Athugið smurþjónustubók.
  • Athugið hjólbarða. Raufar í mynstri skulu vera a.m.k. 1,6 mm á dýpt þar sem þeir eru mest slitnir. Hjólbarðar eiga allir að vera af sömu gerð. Skoða þarf hvort hjólbarðar séu misslitnir. Ekki má vera hlaup í hjólum.
  • Eru felgur dældaðar, það getur verið ábending um að bílnum hafi verið ekið óvarlega.
  • Ræsið vélina. Hlustið eftir óeðlilegum hljóðum.
  • Athugið útblásturskerfið.
  • Er hlaup í stýri?
  • Stígið fast á hemlafetil. Fótstig á ekki að fara alveg í botn, heldur á að vera gott bil niður að gólfi.
  • Athugið höggdeyfa með því að ýta á aurbretti yfir hverju hjóli. Haldi bíll áfram að fjaðra geta höggdeyfar verið bilaðir eða ónýtir.
  • Athugið kílómetramæli. Berið álestur saman við almennt útlit og aldur bifreiðarinnar. Reikna má með að meðalakstur sé frá 15.000 - 18.000 km á ári.

Orkunotkun

Þú getur skoðað orkunotkun nokkurra algengra bílategunda hjá Orkusetrinu með því að smella hér

Ökutækjaskrá Samgöngustofu

Þú getur skoðað grunn upplýsingar um skráningu ökutækja á vef samgöngustofu með því að smella hér